Urweze by Umusizi Murekatete

Follow 0 fans

Umusizi Murekatete

8:11

0 Views

 The easy, fast & fun way to learn how to sing: 30DaySinger.com

Niko ye
Umubyeyi ubyara
Isi akayuzuza byo gusaga
Nta bahe uburere
Nta batoze Umuco w'abantu

Nta batoze izo Ndangagaciro
Yaba akoze nk'ubwo murimo ki?
Mbe Murekatete
Mutesi i wabo
Ukaba Umutoni i Rwanda

Mbe Muzezwanzu mwari nkunda
Uko nagutoje nirwo rugendo
Dore impano nziza ni impamba
Kandi impamba nziza
Ni impanuro mwana wanjye.

Nguku uko rero
Baduhoranira urugori
Abanyarugabo b'i Rugaragara
Ngurwo urugori
Rutashye i Rwinkesha
Rucyura mvugo ituje
Impundu zivuga urwunge
Imbyeyi uko ziri Ku Nama
Ugasanga zibarutse
Imivanda mukondo

Itagira ivata iyo ivuka
Bikaba nk'amata
Abyaye amavuta .
Kurya Kandi Abakamisha
Abasusurutsa Ruhimbi

Batega amaboko zigata izazo
Babingira ukabiburira urugero
Na ya nema yabakwiye
Yo kutwibaruka ikababera
Ikaba ubukombe hose.

Karame mawe
Karambe mushumba
Uragiye ikibaya
Zirisha zigashira inzara
N'inzigo bikajyana

Karame rwambariro rw'abarimbye
Bariboye uko bareshya
Kabeho rwego zikesha kubaho
Umugongo waguhetse uragahoraho
Urya waguhetse

Nawe mawe
Ugume ugutoze
Ukunde utore
Uzibukire ibyaziruwe
Byahoze bizira .
Nkwitabye bwangu
Umutoni nkwitabanye

Ubwuzu n'ubwira
Unkundire nkwibarize unsubize
Ahari aho nanyurwa
Uru rwamo rweze hose
Uru numva rwasagambye

Imisozi yose
Rwashyira ntirusubire kurumbuka ukundi
Rugahosha ubwo Kandi .
Nacyera kose Nyinaw'umuntu
Yari nyina wabose

Imana yirirwa hose
Imana yambazwa na Bose
Imana ivamo n'iyo
Imandwa zambaza
Imana idatindahaye

Idatira amaboko
Imana imenya ibirezi
Ikamenya imbuto
Kugeza Ku nararibonye
Ntihagire usaza asongwa

Ahubwo akisazanira
Ubugingo buzima .
Imana imenya abakora
Abakosa ikabacyaha
Ikabacyahisha cya gitsure

Cy'ubumana bwayo
Na ya neza yayo
Ikadusendera imitima
Ikadukwiza bwa buranga bwayibereye
Tugakunda n'uburere bukagwira.

Nyina w'umuntu uwo
Akagira Ubumuntu
Ubumuntu mu Bantu
Akaba umuntu nya muntu
Akarembuza abarembye

Akazira Ku baremba
Akagira ubumana
bwamugishiyemo butagishuka
Urukundo urugwiro bikamuranga
Abo yibarutse agakikira  akonsa

Bakizihirwa mu mugongo
Abo beza bose
Ugasanga basusurutse hose
Ari nta kibasonga
Ariyo masonga atigera gusumbwa

Ibyo bikamuheta
Kwitwa umubyarabeza umubyarirangoma
Agahora yahimpumbya
Ngo ejo impundu zizavuge hose
Abo abyaye bamwe abyiruye

Batamazwe na dondi
Dore ko yeze ino hose .
Berwa hose
Nyambo yatunyuze
Ukaduteha kunyura benshi

Ukadukoma  imanga
Yarimanitsemo ubupfu n'ubupfapfa
Kuba za kabwera izo zibwerabwera
Z'imitima ihora irehareha
Itigera irambya mu byiza

None mubyeyi w'ubu na buriya
Nkwibarize unkundi umbarire
Ntungaye Kandi kuko ntashyoma
Ndibaza ,
Urarera cyangwa urarorera ?

Ni iki cyabateye
Ni inde gatumwa wabateye
Watumye mutacyumva
Ese ni iki kibatera
Kudatera ipfunwe n'iyi mivanda

Yandavuye yandagaye
Mugahora mutinyuka
Kwerura ko barimbye
Nyamara Kandi barumbye
Kandi ngo bokamwe n'ububobo

Babaye ibigendajoro
Mu majeri
Mu gicuku cya mvahe
Na njyahe ntibagikangwa
Baba buguruza

Nta mutima na busa
Urumiya rwabasumbiye byose
Bararukiye no mu bababyaye
Nako ngo abababyaye
Izo mburabigwi zidatunga umutima

Ntizigere n'amazuru ngo azirehere
Ngo zinukirwe zumve neza
Umwanda utamye hose
Wo kumva umubyeyi
Ubyiruye amarebe n'imanzi

Ari kubebera mu cyanzu
Ngo azibure icyo cyana
Ngo kabone niyo byakwitwa icyaha
Ngo arakabura icyago
Ngo mpaka inkiko z'iyo n'ino

Zimenye ko yariye icyana
Ubundi ngo icyo azaba
Azanywa umuti
Icyo avuga yiyasira
Icyo yita icyana

Kingana abo abyiruye
None mubyeyi w'ubu na buriya
Urarera cyangwa urarorera?
Hariho abakuze
Babuze ijabo ryo kwitwa ababyeyi


Bahuze bironda
Bahuzwe ibyo bibondo
Bahinga bahiga
Ibitunga umubiri w'ibyo bibondo
Bibeshya cyane ko ibyo bahibibikanamo

Bitunga umubiri
Ari nabyo bitunga umutima
Dore ubu ,
Utumira umwana gutarama
Akaza Ari nta kambaro

Watumaho nyina umubyara
Akaza Ari mbwambare mberwe
Ugakubitwa n'inkuba
Ukagwa inkuraba
Ukibaza   aho aturutse

Niba Ari  iwabo w'abantu
Ukibaza nubwo atagira se
Haba na se wabo
Nyirasenge we
Yasuhutse ahari akiri igitambambuga

Hambere aha
Umubyeyi yari indorerwamo y'ubwiza
Uwiroye wese yibwira uwo ariwe
Nutabikoze nk'uko
Akamucyahira kutagenza

Uko bikwiye kugenzwa
Iby'ubu byacitse umurizo
Biba umuziro
Ko umubyeyi ahana umwana abyaye
Bya bindi byo kurera

Wese nk'uwawe
Uwo muco wacitse cyera
Ukoze uwa rubanda rundi
Bagutobera nyirashyiga
Bigacicikana hose

Ibitutsi bikaba ishyano ryose
Ngo ibise biraryana
Uzasubira kunkorera
Urya mwana
Nzakwicira umwaku

Umwaka wose
Sinamubyaye ngo umukore .
Turi mu isi yisibaniro
Aho buri wese amenya ibye
Aho buri wese amenya uwe

Aha nanjye ndashyenze ahari
Buri mubyeyi amenye uwe
Ubu burumbo
Njye mbona nk'irimbi
Twicukurira buri gicuku

Busagambye imisozi yose
Ubwo bwaba bugwije
Ababyeyi bibagiwe igihango
Igihango cyo kwitwa dawe mawe
N'abo babyaye

Maze abo bamenya ababo
Bagatora inzira yo gukebura
Abo bangana
Bagatora bagasubira
Ku isoko Kwa Bose

Abahizi uko basogokuru babisize
Bagaruke begukire ibibondo
Ihiiiiiiiii!!
Uburinganire se buringaniza abatuzuzanya?
Twaratewe ntitwitere

Turumve ntitwumvirane
Ngo twumve uburinganire
Tubugire uburindagire
Ejo tutaba abarindagire!
Sinzi aho mperutse kwigaba

Mu ijoro rijigije
Abarwubakanye bakunze
Bakundanye Kandi uruzira kujorwa
Bariho basizana basubiranyemo
Umugabo ati sasa

Cyangwa utumuke urenze ivumbi
Umvire aha ubutahagaruka
Umugore ati sasa ususurutse
Nibirimba ubirore twararinganiye di!
Yego mwararinganiye simbyanze

Ariko Kandi mwaringanira mwasubira
Mwaringanira mute mutuzuzanya ?
None mutima w'urugo
Muri wa murimo w'abakuze
Akwimye urusokozo

Aho umusana ntiwakubana isayo
Mwaringanira se bikwiye ?
Agusabye kugira nk'uko agira
Wabigira mukizihirwa ?
None mugabo muganji

Bibaye iteka ko amezi icyenda
Uyakimbagirana ikibondo mu nda
Wabikora uko bikwiye
Wabigegena nk'uko byagenwe?
Kandi se azindutse iya rubika

Akabaduka adakomye
Akagutana ibyo bibondo
Wabiramiza izo byeri
Uhembuka muri kabari?
Muringanire munuzuzanya

Mubyeyi umenye
uko ukwiye kugenza
Umenye n'uko ukwiye kugenda
Inshingano yawe
Iracyari ya yindi

Kwitwa umubyeyi udasimburwa
Umubyeyi wa Bose
Irerero rya buri Bose
Ibyo kwitana ba mwana byabateye
Ayo ni amateshwa atagira shinge

Mureke ayo mashitani
Agushe ishyano
Burere wongere urimbe
Utungwe na Bose

Abakuru bagutunge
Bagutoze abato
Nzazinzika ugarutse Ku isoko
Ducaniye Umuco w'Ubupfura
Ikizira cyongeye kuzirwa.

 The easy, fast & fun way to learn how to sing: 30DaySinger.com